Astelehenean, maiatzaren 24an, Errenteriatik abiatuko da Gipuzkoako Pentsiodunak elkarteak antolatu duen bizikleta martxa. Pentsio publiko duinak! Murrizketarik ez! leloarekin, Gipuzkoa zeharkatuko du herriz herri, barikura bitartean.
Honako etapak egingo dituzte:
- Maiatzaren 24: Errenteria-Tolosa
- Maiatzaren 25: Tolosa-Zumarraga-Urretxu
- Maiatzaren 26: Zumarraga-Bergara
- Maiatzaren 27: Bergara-Deba
- Maiatzaren 28: Deba-Usurbil
- Maiatzaren 29: Usurbil-Donostia
Ola-Mendiola
Maiatzaren 27ko etapan Bergaratik Soraluzera etorriko dira, errepidetik. Olatik sartuko da bizikleta martxa, 09:35ean eta honako ibilbidea egingo du: Santa Ana-Plaza Berria-Kalebarren-Plaza Zaharra-Gabolats-Ezozibide-Mendiola.
Soraluzen, zain izango ditu herriko pentsiodunen mugimenduko kideak eta pentsio publiko duinak aldarrikatu nahi dituzten soraluzetarrak. Bizikleta martxari herriko ibilbidean lagunduko diote. Soraluzeko hitzordua da 09:15ean.
Atzoko elkarretaratzean eman zuten horren berri eta martxan parte hartzeko deia egin zuten. Elkarretaratzeari dagokionez, berriz, 50 bat lagunek parte hartu zuen.