Barikutik astelehenera bitartean, beste 8 herritarrek eman dute positibo SARS CoV-2a detektatzeko probetan. Azken zazpi egunotan,13 kontabilizatu dituzte. Eta azken 14 egunotan 36 izan dira, guztira.
Hori horrela, apurka-apurka bada ere, behera egiten segitzen dute datuek. Adibidez, gaurko intzidentzia tasa-metatua 905,89 da eta joan den barikukoa 956,22 izan zen.
Egoitzakoak ezin dira kalera jaitsi
Hori bai, beste aste batez, behintzat, eremu gorrian segituko du Soraluzek. Horren ondorioz, ostalaritzari eta kirol jarduerei begira ezarritako neurri murriztaileagoek indarrean segituko dute. Herriaren itxiera perimetralak ere bai. Eta besteak beste, Mesedeetako egoitzako bizilagunak ezin izango dira herrira jaitsi paseora, egoitzaren inguruan ezarri duten “eremu seguruan” ibili beharko dira.
Egoitzatik esplikatutakoaren arabera, Diputazioak erabaki du eremu gorrian dauden herrietako egoiliarren kasuan neurri hori ezartzea.
Debabarrenean, lau eremu gorrian
Eremu gorriarekin segituz, zerrendara gehitu dituzte eskualdeko beste hiru herri: Eibar, Deba eta Mutriku.
Nabarmena da positibo kopuruek Deban izan duten gorakada. Hain justu, Osakidetza aste honetan baheketa masiboa egiten hasi da martxoaren 31tik Itziarko Urberu sagardotegira joan ziren pertsonei.
Beste aldean dago, berriz, Elgoibar. Joan den astetik daukan kolore horiari eutsi egiten dio.
Hona hemen apirilaren 12tik apirilaren 18ra bitarteko datuak, herriz herri:
- Eibar 98 549,61
- Elgoibar 17 268,63
- Mendaro 2 330,97
- Deba 46 935,26
- Mutriku 17 526,91
- Soraluze 13 905,8
- Debabarrena 193
Eremu gorria
Eremu gorriari dagokionez, berriz, honako hauek dira zerrenda horretan dauden 5.000 bizilagunetik gorako herriak:
Amurrio, Aretxabaleta, Arrasate, Astigarraga, Azkoitia, Azpeitia, Beasain, Berango, Bilbao, Deba, Donostia, Eibar, Erandio, Errenteria, Getxo, Hernani, Hondarribia, Lasarte-Oria, Laudio, Lazkao, Legazpi, Leioa, Lezo, Mutriku, Oiartzun, Ondarroa, Oñati, Ordizia, Orio, Pasaia, Portugalete, Sestao, Tolosa, Urnieta, Urretxu, Trapagaran, Villabona, Gasteiz, Zarautz, Zumaia eta Zumarraga.
Honako hauek dira, berriz, 5.000 bizilagunetik beherako herriak:
Aia, Alegia, Anoeta, Aramaio, Ataun, Aiara, Berantevilla, Elduain, Eskoriatza, Gabiria, Getaria, Ibarra, Irura, Itsasondo, Bastida, Laguardia, Legorreta, Otxandio, Soraluze, Urduña, Zaldibia, Zambrana, Zestoa eta Zizurkil.