Oraingoz, hala ere, gutxik eman du izena literatura saiorako. Udaletik emandako informazioaren arabera, Irakurleen Klubeko ohiko kideez gain, beste hiru lagunek baino ez dute izena eman, Soraluzekoak hirurak. Beraz, 12 lagun daude izena emanda: 4 gizon eta 8 emakume.
Harkaitz Cano moduko idazle entzutetsu bat ekartzeari buruz galdetuta, berriz, esplikatu dute Irakurleen Kluba abian jarri zenetik, ohitura dagoela, tarteka, idazleren bat ekartzea. “Aspaldi geneukan Harkaitz Cano gonbidatzeko nahia. Lehen ere egin izan dugu ahalegina, baina agenda kontuengatik ez da posible izan. Orain, ordea, bai. Fakirraren Ahotsa liburuak harrera polita izan du irakurleen artean eta horregatik aukeratu dugu”.
Liburua doan
Literatura saioan parte hartzeko udaletxean eman behar da izena, maiatzaren 3a baino lehen ( 943 75 30 43 edo udaletxeko harreran) . Edozein herritarrek parte hartu ahal izango du, klubeko kide izan ala ez. Parte hartzeko, baina, ezinbestekoa izango da proposatutako liburua irakurrita joatea. Hori bai, izena ematen dutenek liburua doan eskuratu ahal izango dute.