Azken egunotan, abiada bizia hartu dute kutsatzeek Soraluzen. Adibidez, apirilaren 9an, 9 positibo atzeman zituzten, beste 4 zapatuan eta 5 atzo, domeka.
Orain dela bi aste kontabilizatutako 15 positiboei, beste 23 gehitu behar zaizkie azken astebete honetan. Beraz, 14 egunetan, 38 herritarrek eman du positibo PCR probetan.
Horren eraginez, nabarmen handitu da intzidentzia-tasa metatua eta gaur, 956,22koa da.
Eremu gorrian
Ondorioz, gaur bai, gaur sartu dute Soraluze eremu gorrian. Baita Gipuzkoa bera ere.
Honakoak dira zerrenda horretan dauden herriak.
5.000 bizilagunetik gorakoak: Aretxabaleta, Arrasate, Astigarraga, Azkoitia, Beasain, Bilbao, Errenteria, Getxo, Hondarribia, Lasarte-Oria, Lazkao, Legazpi, Lezo, Markina-Xemein, Muskiz, Oiartzun, Ondarroa, Oñati, Ordizia, Orio, Pasaia, Portugalete, Sestao, Tolosa, Urretxu, Villabona, Gasteiz, Zarautz eta Zumarraga.
5.000 bizilagunetik beherakoak: Aduna, Alegia, Anoeta, Atxondo, Berriz, Berrobi, Bidania-Goiatz, Eskoriatza, Hernialde, Ibarra, Irura, Itsasondo, Bastida, Legorreta, Legutio, Olaberria, Soraluze, Zaldibar, Zaldibia, Zegama eta Zizurkil.
Neurri berriak
Eremu gorrian sartu izanaren ondorioz, bihartik, martitzena, orain artekoak baino neurri murriztaileagoak aplikatuko dira herrian. Honako hauek:
- Batetik, herria perimetralki itxita izango da. Hau da, bakarrik irten ahalko da lan edo zaintza kontuetarako, erosketetarako eta aire zabalean jarduera fisikoa egiteko.
- Bestetik, ostalaritza- eta jatetxe-establezimenduek murriztu egin beharko dute jendaurreko ordutegia barruko aldean eta honakoa aplikatu: 06: 30etik 09:30era; eta 13:00etatik 16 30era. Horrez aparteko zerbitzua terrazetan eskaini beharko dute.
- Eta azkenik, barnealdeko kirol-jarduerak ezingo dira 4 pertsona baino gehiagoko taldetan egin, talde profesional eta federatuen entrenamenduei eta lehiaketei dagozkienak izan ezik. Gainera, kirol-instalazioetako aldagelak eta dutxak itxita izango dira, igerilekuetakoak izan ezik; horietan, hori bai, edukieraren% 35a erabili ahalko da eta dutxak banaka erabili beharko dira.
Debabarrenean zer
Debabarrenari dagokionez, berriz, Elgoibar eta Deba izan ezik, gainerako herri guztiak laranjan daude.
Hona hemen eskualdeko datuak herriz herri:
- Eibar 53 345,78
- Elgoibar 14 268,63
- Mendaro 5 330,97
- Deba 5 165,05
- Mutriku 11 338,73
- Soraluze 23 956,22
- Debabarrena: 111