“Guk lehen-lehen lerroan egiten dugu lan. Ondorioz, baita COVIDa duten gaixoekin ere. Adibidez, atzo bertan (eguaztena), etxean erorikoa izan zuen agure batengana joan behar izan genuen, COVIDaz kutsatuta egon daitekeen pertsona baten etxera. Izan ere, bere semea ospitaleratuta dago COVIDarengatik. Hala eta guztiz ere, ez digute txertorik eman eta eskatu arren, oraindik ez dakigu noiz emango diguten”, kontatu du Bittor Murguzurrek, larrialdietako osasun teknikariak.
Murguzurrek kontatu du, bere kasuan, COVIDarekin bateraezina den patologia duela, beraz, ardura bikoitza duela. “Gainera, etxean umea eta emaztea ditut… egia esan, beldurrez joaten gara lanera”.
Eta gogora ekarri du eurak ere osasun arloko profesionalak direla. Anbulantzian joaten dira larrialdia dutenei arreta ematera, hori da desberdintasun bakarra. "Nik, adibidez, anbulantzia gidatzeaz aparte arreta sanitarioa ematen dut. Azken batean, anbulantzietan lan egiten dugun guztiok egin ditugu bi urteko ikasketak sanitario izateko eta guztiok ematen dugu arreta hori", esplikatu du.
Bestela, greba
Bizi duten egoera salatzeko, mobilizazioak egiten hasi dira egunotan, atzo Donostian eta gaur Bilbon. Otsailaren 23an, berriz, Gasteizen mobilizatuko dira. Ohartarazi dute kasurik egin ezean, grebara joko dutela, “nahiz eta ez dugun nahi, ze bizi dugun egoera ez da greba egiteko aproposena, baina…”
Estatuko bestelako erkidegoekin alderatuta, gainera, EAE da larrialdietako osasun teknikariak txertatu barik dituen bakarra.