Matrikulazio berririk ez Haurreskolan

Umeak Haurreskolan, abenduan. Argazkia: Soraluzeko Haurreskola.

Urte hasierako matrikulazio epean inork ez du eman izena ikasturtea amaitu aurretik Haurreskolan sartzeko. Gaur itxiko dute epea ofizialki, baina Haurreskolatik gogora ekarri dute lekua dagoen bitartean izena emateko aukera ere badagoela. 12 ume daude orain bertan eta beste bat sartuko da otsailean. 

Guztira, 21 umerendako lekua dago Haurreskolan, beraz, nahiz eta gaur, urtarrilaren 13, bukatu aurtengo ikasturterako izena emateko epea, lekua dagoen bitartean, nahi edo komeni denean eman daiteke izena, hemendik uda bitartean Haurreskolara joan ahal izateko. 

“Normalean urte hasieran ez da ume berririk etortzen; deialdi hau izaten da, batik bat, lan-jardunean edo bestela aldaketaren bat izan duten familiei begira zerbitzua eskaintzeko. Ikasturte berrirako deialdian, maiatzean, hor bai egoten dira izen-emate berriak”, esplikatu dute Haurreskolatik.