Asteburuan, herritar asko ibili da mendian elurraz gozatzen. Asko oinez bertaratu da baina beste asko autoz. Eta azken horietako hainbatek bizilagunen joan-etorria oztopatu egin zuten, autoa txarto lagata. Horrez gainera, zapatuan, hainbat arazo izan ziren San Andresko parkingean, ibilgailuen pilaketak eraginda. Eta atzo, elurra kentzen zebilen beharginarekin gertakariren bat ere izan zen, gidari baten kontura.
Hori ikusita eta bereziki kontuan hartuta bihar jai-eguna dela, Udalak erabaki du gaurtik San Andres-Txurrukarako bidea ibilgailuendako itxita izango dela, Keixetako errekatik gora, justu; eta Ezozi auzoan, gauza bera egin dute, bertako plazatik gora.
Bakarrik pasatu ahalko dira baimendutako ibilgailuak edo bertako bizilagunenak. Goizean bertan adierazi dute debekua seinale bidez.
Noski, oinez, nahi beste joan daiteke mendira.