COVID-19 dela eta, abendu hasieran Gipuzkoako Foru Aldundiak presazko deialdia egin zien Udalei, hirigintza proiektu “eraldatzaileak” aurkezteko. Soraluzeko Udalak Gipuzkoa etorbidekoa aurkeztu zuen eta Diputazioak onespena eman zion egitasmoari, “herri barruko irisgarritasuna nabarmen hobetzen duelako, gainera, berez, periferiko samarrak diren bi auzune lotuz”, Aldundiko Mugikortasun Sailetik esplikatutakoaren arabera.
Soraluzeko proiektuarekin batera, beste sei proiektu onartu ditu: bi Donostian eta bana Irunen, Aretxabaletan, Berrobin eta Idiazabalen. Proiektuek %65ko dirulaguntza jasoko dute diputazioarengandik.
Ia 400.000 euro
Udal iturriek helarazitako informazioaren arabera, Soraluzeko pasabide berriak 390.212,65 euroko aurrekontua du (BEZa aparte) eta gauzatzeko 7 hilabeteko epea. Obrak hasita diren arren, gaur goizetik hasita (astelehena) datozen hamabost egunetan proiektua Kontzejupean egongo da ikusgai, zehatzago ezagutu nahi dutenentzat.