Kexak, eskariak eta jakingarriak

Zakarrontziak behin eta berriro gainezka, San Andres auzoan

Bariku goizean, San Andres auzoko zakarrontziak gainezka zeudela jakinarazi zion bertako auzokide batek Soraluzeko Udalari. Argazkiek erakusten duten moduan, zakarrontziak beteta zeuden eta haien inguruan denetik, lurrean botata. Egunean bertan garbitu zuten ingurua, baina ez zuen luzaroan iraun garbi. Domeka goizean atzera ere zegoen guztia gainezka. Gainera, kale-zurruta egin ondorengo hondakinak ziren, batik bat. Jarrera hori salatu egin du Udalak. 

Barikuan, auzotarren deia jaso ondoren, mankomunitateko langileei deitu eta Soraluzeko Udaleko zinegotzi Abel Olaizola San Andres auzora bertaratu zen, egoera zein zen ikustera.

Berak ateratako argazki sortak erakusten duen moduan, zakarrontziak gainezka zeuden. Haien inguruan, gainera, fardelak, pintxatutako baloia, garagardo latak... eta bestelako hondakinak zeuden lagata.

Guztia garbitu  zuten, bai Olaizolak berak eta baita mankomunitateko langileek ere. 

Hara ezustekoa eta disgustua, atzo goizean, domeka, atzera ere zakarrontziak gainezka ikusi zituenean Olaizolak.  Oraingoan, batik bat edarien ontzi hutsak (botilak eta latak) ziren nagusi. 

Ez dugu ezer ikasi, dio zinegotziak. Zer gertatu behar da ikasteko?