Luxuzko programazioa Blues Hotsak jaialdiaren bigarren edizioan

Gisele Jackson kantaria.

Datozen bi asteburuetan, Blues Hotsak Jaialdiaren bigarren edizioa ospatuko da herrian eta lau talde ariko dira bertan: Gisele Jackson & The shu shu shu's, Dama Beltzak, Travelling Brothers eta Amparo Sanchez (Amparanoia). Dagoeneko, kontzertuetarako sarrerak salgai daude Iratxo goxodendan. 

Guztira, bost musika kontzertu eta liburu aurkezpen bat eskainiko dituzte antzokian. Ubane Uzin Errabal Jazz elkarteko kide eta jaialdiaren antolatzailearen esanetan, aurtengo edizioan bluesa izango da nagusi eta programazioa "luxuzkoa" izango da: "Jaialdi hau pentsatuta dago Euskal Herri osoko zaletuak erakartzeko, eta hori dela eta, jaialdian izango ditugu nazioartean ezaguna den artista bat, Europan eta estatu mailan diharduten bi talde, euskarazko sorkuntza berezia eskaintzen duen emanaldia... Eta horiekin guztiekin batera, herriko musikariak, Musika eskolako ikasleak. Horiek ere izango dute beren lana erakusteko aukera". 

Lehen asteburuan, musika beltzaren tradizioa 

Gisele Jackson kantari estatubatuarrak irekiko du blues jaialdia azaroaren 21ean, arratsaldeko 18:00etan eskainiko duen soul kontzertuarekin . Nazioarteko artista ezaguna eta bere taldea Bartzelonatik helduko dira zuzenean, musika beltzaren tradizioari lotutako musika emanaldia eskaintzera.

Hurrengo egunean, azaroaren 22an, eguerdiko 13:00etan, Musika eskolako musikarien txanda izango da eta arratsaldean, berriz, 18:00etan, Estitxu Pinacho kantariak Dama Beltzak izeneko emanaldia eskainiko du, bost emakume beltz kantariren bizitzak ardatz dituena: Ella Fitzgerald, Nina Simone, Roberta Flack, Etta James eta Aretha Franklin. Euren kantak interpretatu eta Leire Cano idazleak espresuki idatzitako testuak ere errezitatuko dituzte. 

Bigarren asteburuan, Travelling eta Amapro Sanchez 

Travelling Brothers taldeak abiatuko du jaialdiaren bigarren asteburua, azaroaren 28an, zapatuan, arratsaldeko 18:00etan, eskainiko duen kontzertuarekin. Leioako seikotea ezaguna da Euskal Herrian, izan ere, ibilbide luzea eta zuzeneko ikusgarria duen taldea da, bere garaian Gaztelupeko Hotsak disketxearekin lau disko grabatua eta 2015ean Europako blues talderik onenaren izendapena lortu izanaz geroztik, nazioarteko jaialdirik onenetan jotzen diharduena. Emanaldian, bluesa,
soula eta rock&rolla uztartzen ditu.

Jaialdiaren azken egunean, azaroaren 29an, domekan, Amparo Sanchez kantari espainiar ezagunak La niña y el lobo bere azken disko-liburu proiektua aurkeztuko du. Lehenik, Eeguerdian, 12:30ean, liburua aurkeztuko du eta arratsaldean, 18:00etan, diskoa. Lan autobiografiko horretan Sanchezek kontatzen du indarkeria matxista ardatz duen istorio "basati, urratzaile eta pertsonala". Liburuak hirugarren argitaraldia du eta oraingoan liburuari soinu banda propioa erantsi dio hamar bertsiorekin, besteak beste: Radio Futuraren Han caído los Dos, Mano Negraren Mala Vida. Los Lobosen La pistola, Armando Manzaneroren Adoro... Gainera, kontzertuan iaz argitaratu zuen Hermanas musika lana ere aurkeztuko du, latindar eta flamenko airea duena. 

Sarrerak eta gonbidapenak Iratxon

Kontzertuetarako sarrerak dagoeneko salgai daude Iratxo goxodendan: 10 eurotan Jackson, Travelling eta Amparoren kontzertuetarakoak, eta 5 eurotan, Dama Beltzak ikuskizunerakoak. Eguerdiko saioetara joan ahal izateko, berriz, gonbidapena eskuratu beharko da Iratxon bertan. Aforoa mugatua izango da eta gehienez 70 ikusle sartu ahalko dira emanaldi bakoitzean. 

Soraluzetik kanpoko herritarrek udaletxera deituz (943753043) erreserbatu beharko dituzte sarrerak eta ziurtagiri bat ere jasoko dute emanaldira etorri ahal izateko.