Irure zein Txurruka auzoetan, bietan bota dituzte zuhaitzak bart gaueko haize ufadek. Bi kasuetan, auzoetako bizilagunak ibili dira zuhaitzak mozten. Soraluzeko Udaleko langileak egoera ikuskatzera joan direnean, mendi-bide guztiak garbi zeuden.
Alkateak esandakoaren arabera, Txurrukarako errepidean auzotarrek erretiratuta laga duten zuhaitza zatitu egin dute udal langileek, trabarik egin ez dezan. Horrez gainera, errepide bazterrean dagoen intxaurrondo baten egoeraren berri eman dio Udalak Aldundiari; Iker Aldazabalek esplikatu duenez, errepide zati hori Aldundiarena da eta zuhaitza jausteko arriskuan ikusi dute.
Irure auzoan, berriz, jausita zegoen zuhaitza bertako bizilagunek moztu dute. Udalak Debemeni abisua pasatu dio, traktorearekin sustraiak kentzera etor daitezen.
Bestelako kalteen artean, SAPAko hainbat kristal apurtu egin ditu haizeak, Elizburuko eskaileretan ur-tutu zati bat azaldu da lurrean puskatuta eta Plaza Zaharrean, hainbat toldo apurtu edo bota egin ditu.
Beraz, badirudi Plaza Zaharreko karpak jasan dituela kalterik handienak.
ARGAZKIAK: Soraluzeko Udala