Anbulatorioan konfirmatutako zazpi positiboak gehituta eta Osakidetzak atzo argitaratuta datuen arabera, urriaren 9tik Soraluzen 13 herritarrek positibo eman dute PCR probetan. Joan den asteko datuekin alderatuta, bikoiztu egin da herriko positibo kopurua.
Anbulatorioko medikuen esanetan, okerrena da jendeak ez duela protokoloa errespetatzen: “Joan den barikuan positibo bat azaldu zenetik, progresiboki ari dira kutsatuak azaltzen. Izan ere, positibo diren guztiek ez dituzte ematen kontaktua izan duten guztien izenak, haiek kalera irteten dira eta egunetik egunera positibo gehiago azaltzen dira".
ZIUn inor ez
Gaixoen egoerari dagokionez, bat ospitaleratu egin dute pneumoniarekin. Gainerakoak etxean dira. Bestalde, zentzu horretan, albiste positiboa ere bada, izan ere, azken egunotan ZIUn ospitaleratuta zeuden bi herritarretako bati senda-agiria (alta) eman diote eta beste bat plantara pasatu dute.
Osakidetzak laster argitaratuko ditu azken datuak, atzokoak eta bertan ikusiko da zein den eskualdeko erretratua.