Hiru langilek izan ezik, Mesedeetako egoitzako gainerako langile guztiek bat egin dute gaurko deitutako greba egunarekin: erizain-laguntzaileek garbitzaileek eta harrerakoak (sukaldeko langileak beste enpresa batekoak dira). Lanuzterik ezin izan dutenez egin, besteak beste, arlootako hainbat langilek argazki bitartez irudikatu dute protesta egoitzan bertan.
Horrez gain, goizean manifestazioa egin dute Donostian sektoreko langile askok. Egoitzetako langileekin batera, Gipuzkoako Senideak, pentsiodunen hainbat plataforma eta Zaintza Iraulik ere hartu dute parte manifestazioan. Soraluzeko Pentsiodunen Mugimendutik ere elkartasuna helarazi zieten joan den astean.
Protestaren bitartez, hitzarmena lehenbailehen sinatzeko eskatu dute. "Horrela, lan-baldintza hobeak, plantilla handitzeak, bitarteko gehiago eta hobeak lortzea, azken batean, bizi- eta lan-baldintza hobeak lortzea ekarriko bailuke", ELA sindikatuaren esanetan.