Soraluzeko egoitzan ez dute atzeman COVID-19 birusaz kutsatutakorik. Egoitzako zuzendaritzatik jakinarazitakoaren arabera, orain dela 15 egun egoiliar eta langile guztiei egin zizkieten PCR probak, eta emaitzen arabera, guztiek negatibo eman zuten, "beraz, momentuz, ondo gaude", diote.
Gainerakoan
Gipuzkoako Foru Aldundiak helarazitako azken datuen arabera, berriz, gaur egun, lurraldean bost egoiliarri atzeman diote COVID-19a. Bost kasuak Donostiako San Ignacio-Hermano Garate konplexukoak dira eta Eibarko Ospitaleko hirugarren solairuan daude ospitaleratuta.
Bizkaian, berriz, 55 egoiliar eta egoitzetako 68 langile daude diagnostikatuta eta azken egunotan, bi egoiliar hil egin dira COVID-19 koronabirusak jota. Arabari dagokionez, han hiru egoiliarrek eman dute positibo eta Nafarroan 14 egoiliarri eta egoitzetako bost langileri atzeman diote COVID-19a.
Bestalde, gaur, astelehena, Gizarte Zerbitzuen Lehendakariordetzak zaharren egoitzetako lantaldea deitu du, autonomia erkidegoek zentro horietako COVID-19 agerraldien egoeraren berri eman dezaten, baita zer premia edo zailtasun dituzten ere.