Goizeko lehen ordutik, Olako zubian daude udaltzainak, gidariei gogora ekartzeko itxita dagoela hortik erdigunerainoko errepide zatia. Ibilgailuen joan-etorria saihesbidetik dago desbideratuta, semaforo bidez pasoa emanez, autobusen joan-etorria barne.
Hori dela-eta, gaurtik eta Errekalde 10eko etxea botatzeko obrak bukatu arte, Santa Ana kalea eta Zubi Nagusia egun osoan zabalik izango dira ibilgailuentzat; ez, ordea, Gabolats eta Etxaburueta kaleak; azken bi horiek arratsaldez itxita izango dira eta oinezkoen gune izaten segituko dute.
Obrei dagokienez, Errekalde 10eko etxea hondamen egoeran dagoela-eta, hura bota egingo du Construcciones Echaide enpresak. Makina bidez eta eskuz botako dute, zatika; bestela esanda, ez dute lehergailurik erabiliko eraisketa-lanak egiteko.
Aurreikuspena da obrak gaur hasi eta hilabetez luzatuko direla. Aurrekontua, berriz, da 53.111,4 euro.
Zirkulazioan aldaketak
Zirkualzioari dagokionez, honako aldaketak ezarri dituzte:
- Atxuri, Errabal eta Baltegieta kaleetara joateko Zubi Nagusitik joan beharko da. Halaber, Atxuri eta Errabal kaleek bi norabidetako zirkulazioa izango dute.
- Erdigunea zirkulaziorako zabalik egongo da (Santa Ana eta Zubi Nagusia).
- Ezozibide-Ola-Ezozibide inguruko zirkulazioa semaforo bitartez bideratuko dute.
- Pesa-Lurraldebusen autobus geltokiak Estaziñoan zein Ezozibide 16an egokituko dituzte.
- Mendarorako autobus geltokiak, berriz, Sagar-Errekan, Ezozibiden, Estaziñoan eta Olako zubian izango dira.