Bihar, domeka, ekitaldi gehiago egongo dira, haiek ere goiz-eguerdi partean. Alberto Ramirezek bihar ere ipiniko ditu artelanak zubian: “Originalak, obra grafikoa, serigrafia, eskulturak…” Lanok ikusteko eta erosteko aukera izango da, gainera; 50 eurotik hasita eskura daiteke Soraluzeko artistaren artelanen bat.
Horrez gain, Debabarreneko Gazta Azoka egingo dute Plaza Zaharreko karpan, 09:00etan hasita, eta bihar ere izango da musikarien kalejira; kasu honetan, txistularien eta gaiteroen eskutik.
Gau-giroa
Gau-giroari dagokionez, iragarritako moduan, bart gauean Ertzaintza bertaratu zen bizpahiru aldiz eta taberna bakarrari eman zion ixteko abisua. Gainerakoan, 01:00etarako itxita zeuden guztiak. Gaur ere etorriko direla esan dute, antza, gaur jende gehiago espero baita herrian.