Soraluzeko lehen kasu positiboa joan zen eguaztenean atzeman zuten. Gainerako seiak, berriz, asteburuan detektatu dituzte, barikuan, zapatuan eta domekan, egun bakoitzeko bina kasu.
Horrez gain, bakartuta daude beste hainbat lagun, positibo eman duten herritar horiekin kontaktu zuzena izan zutenak, PCR proba egin berri, edo hura egiteko zain.
Hain justu, gaur, astelehena, hainbat soraluzetar Eibarren izan dira, PCR proba egiten eta jakinarazi dietenez, bizpahiru egun barru emango diete proben emaitzen berri.
Atzeman dituzten positibo gehienek Zarauzko eta Eibarko fokuekin dute lotura.
Inguruko herrietan positiboak
Gertuko udalerriei dagokienez, 45 positibo berri erregistratu dira Eibarren. Gaur argitaratutako datuen arabera, guztira 73 dituzte erregistratuta. Ermuan, 71 positibo kontabilizatu dituzte, Elgoibarren, 12 eta Bergaran,17.