Juan Navas Bilbon jaioa da 1975ean, eta “Kantaorea” da. Duela hamar bat urte hasi zen jendaurrean abesten eta bere helburu nagusia da “flamenkoaz gozatzea eta lurralde honetako jendearengana hurbiltzea”.
Navasek aitortzen du askotan galdetu diotela bilbotarra izanik nolatan bihurtu den flamenko kantari; berak halakoetan Enrique Morenteren esaldi bat baliatzen du galdera horri erantzuteko: "Nondik datorren jakin gabe etorri da". Hala ere, aitortzen du flamenkoarekiko zaletasunare parte bat familiatik datorkiola: “Flamenko musika beti izan dut lagun. Hegoaldetik (Cordovatik) emigratu behar izan zuen nire familiari zor diot”.
Flamenkoarekiko grina horrek bide askotatik ibilarazi du bilbotarra: errezitaldi eta jaialdietan parte hartzen hasi zen eta gerora hainbat flamenko taldeko kide ere izan da: ‘Txaleo’, ‘Flamenco Daki’… Soledad Ruz dantzariaren konpainiako kide ere izan da. 2017an, ‘Reflejos de Andalucia’ bere lehen diskoa kaleratu zuen Beñat Arginzoniz olerkari bilbotarraren olerkiak bertsionatuz. Aurten “abentura flamenko berri bat” aurkeztuko du: ‘Digo vivir’, bere bigarren lan diskografikoa. Bertan, ahotsa jarri die Blas de Otero olerkari bilbotarraren poemei.
Soraluzeko emanaldia
Soraluzeko emanaldian Juan Navas kantaoreak lau taldekide izango ditu alboan: Curro Bermejo (gitarra flamenkoa), Lidia de Lorenzo (dantzaora), Dario Campos (perkusionista) eta Julen Biain (palma jotzailea). Bere bi diskoetako kantuak interpretatuko dituzte musika, kantu eta dantza biltzen dituen ikuskizun flamenkoan.
Euskarazko saeta
Urteotan ondu duen kantutegian, euskarazko saeta bat ere badu Navasek, “lehen aldiz, historian”. Letra Beñat Arginzoniz bilbotarrarena da eta droga aipatuz, oroitzen du auzoan (Otxarkoagan) "malamentean hil den jendea".