6-12 urte bitarteko 74 umek eman du izena aurtengo udalekuetarako. 9 hezitzaile arduratuko dira bi aste horietan umeen aisialdi jarduerez, 10:00etatik 13:00ak bitartean, eta bi egunez, 17:00ak arte ibiliko dira.
Baldintza bereziak
Ezohikoak izango dira aurtengo udalekuak, COVID-19ak baldintzatutakoak. Hori horrela, aire libreko planak lehenetsiko dituzte hezitzaileek, umeak askeago ibili daitezen. Hori bai, ez dute herritik kanpora irteerarik egingo eta jolasak egokitu egingo dituzte, segurtasun neurriak betetzeko. Horrekin batera, besteak beste, umeak hamar laguneko taldeetan antolatuko dituzte, taldeen arteko kontaktua eragotziz.
Etzi, horren guztiaren gaineko azalpenak eta udalekuen gaineko xehetasunak helaraziko dizkiete udalekuetan parte hartuko duten umeen gurasoei. Kukumixo elkarteak, aire libreko udalekuez arduratzen den elkarteak deitu du batzarra, 18:00etan, Herriko Antzokian.