Anticimex enpresak datozen egunotan egingo ditu arratoien kontrako aktuazio bereziak, herriko hiru puntutan: Zeletan, Errekalden eta Ezozibiden.
Berez, urtean lau kanpaina egiten ditu enpresa horrek. Azkena otsailean egin zuen. Azken boladan, ordea, lehen baino arratoi gehiago bistaratzen direla ikusita, gaiarekin arduratuta, enpresari berari galdetu dio Udalak zer gerta daitekeen.
Eraginkortasun txikiagoa
Jasotako azalpenaren arabera, orain arte arratoien kontra erabili izan den pozoiak kutsadura eragiten zuen ibaietan, eta, ondorioz, itsasoan. Horren aurrean, Europar Batasunak legea zorroztu eta orain erabil daitekeen pozoiaren printzipio aktiboa makalagoa da. Beraz, arratoiek pozoi gehiago jan beharra daukate akabatzeko. Edo bestela esan, pozoi hori ez da lehen bezain eraginkorra.