2019-2020 ikasturteko eskolak “espero baino lehen” bukatu behar izan zituen Biraka Dantza taldeak, koronabirusak eraginda. Baina dagoeneko datorren ikasturteari begira jarri da, urrian hasi ahal izango duten esperantzaz.
Hori horrela, lehen mailako umeentzat izen-emate epea zabaldu dute. Horretarako, umearen izen-abizenak, jaiotze-data eta telefono zenbakia honako helbidera bidali behar dira: kirola@soraluze.eus.
Datorren ikasturtea antolatu ahal izateko izena ekainean ematea eskertuko duten arren, ikasturte osoan izango da izena emateko aukera. Prezioa da 14 euro hileko.
Egun bi gehiago
Ordutegiei dagokienez, aldaketak daude, besteak beste, kiroldegian egokitu duten goiko gela berriari esker, bi egun gehitu baitituzte Birakarako: martitzenak eta eguenak.
Gainerako mailetako ikasleei dagokienez, berriz, izena emanda daudenen matrikula automatikoki berrituko da, kontrakorik esan ezean. Baja emateko, honako helbidera idatzi behar da: kirola@soraluze.eus. Edo Udal Kiroldegia zabaltzen denean, bertan eman behar da abisu.
Dantza ikuskizuna udazkenean
Ezustekorik ezean, eskolak urrian hasiko dituzte. Urteko dantza ikuskizunari dagokionez, maiatzen egin ohi da, baina aurten bertan behera laga behar izan dute. Hori bai, ahal dela, asmoa da ikuskizuna egitea urria-azaroa inguruan, dena ondo bidean.