Maite Larrañagak, Mikel Santiagok, Jokin Oregik, Beatriz Akizuk, David Lindemannek eta Gotzon Elizburuk gogoeta egin dute koronabirusaren krisiak orain arte ekarri duenaz eta ekarriko duenaz, edo ekarri beharko zukeenaz. Hezkuntza, ekonomia, antropologia, gizatasuna, kontsumoa... bakoitzak bere esparrutik egin du gogoeta, baina guztiek bat egin dute ideia batekin: gauzak aldatzeko beharra dago eta hobe da ez bueltatzea lehengo "normaltasunera”.
Beldur handia
Elkarrizketa nagusian, berriz, COVID-19 gaitza gainditu duten bi soraluzetar dira berbalagun: Satur Gil eta Sinfo Muñoz. Besteak beste, alabek kontatu dute beldur handia pasatu zutela, uste izan baitzuten ama hil egingo zela.
Osterantzean, fase batetik besterako trantsizioan gauden honetan, udal zerbitzuen eta bestelakoen funtzionamendu eguneratuaren berri dakar aldizkariak: liburutegia, udaletxea, anbulatorioa, ikastetxeak…
Sagar-Errekako eukalipto landaketak geldiarazteko eskatzen duen ekimena eta landaketa horrek sortu duen alarmaren gainekoak ere jaso ditu.
Maider Gabilondok UNICEFen Nafarroako koordinatzaileak, eta Enara Agirre EHUko Berdintasun teknikariak ere gogoeta egin dute, iritziari eskainitako tartean.
Txisteak
Eta, besteak beste, pandemiak eta plaentxiarren umore beltza abiapuntu modura hartu eta zenbait ipuin barregarri partekatu ditu Iñaki Galdos politikari eta hizkuntzalariak, Juan San Martin eibartarrarenak.
Maiatzeko Pil-pilean aldizkaria gaur, barikua, partituko da etxez etxe. Edozelan ere, ohi denez, Plaentxia.eus atarira ere badago jasota. Hemen klikatuta ikus daiteke (edo atariak prentsari eskaintzen dion ohiko lekuan).