Alarma egoera izan arren, odol emaileen elkarteek segitu egin dute odol ateratzeak egiten. Soraluzen horrela egin zuten martxoan; 23 emaile bertaratu ziren. Orain, berriro deitu dituzte herriko emaileak, barikuan odola ematera joan daitezen. Beti da beharrezkoa odola, baina oraingo egoeran, inoiz baino gehiago.
Hori bai, normalean baino babes neurri handiagoak erabiliko dituzte odol ateratzeak egiteko, bai odola ateratzera datozenek eurek, baita ematera doazenek ere.
Azken horien, odol-emaileen kasuan, adibidez, maskaraz babestuta joan beharko dute odola ematera, bihartik derrigorrezkoa izango baita maskara erabiltzea. Edozelan ere, norbaitek halakorik ez badu, odol emaileen elkartekoek emango diote han bertan.