Harrera ona izaten ari da Soraluzeko Udaleko Kultura Batzordeak eta Krabelin Pintura Eskolak antolatutako #MarraztuEtxean izeneko marrazki-lehiaketak. Orain arte, 30 lan aurkeztu dituzte, eta oraindik bi egun daude gehiago aurkezteko. Urteko garai honetan kalean antolatu ohi den marrazki lehiaketaren online bertsioa da #MarraztuEtxean lehiaketa.
0-15 urte
Gai librean, 0 eta 15 urte bitarteko edozein haur eta gaztetxok parte har dezakete lehiaketan, zuri-beltzean zein koloretan egindako marrazkiekin. Haur bakoitzak marrazki bakarra bidali ahal izango du.
Lehiaketan parte hartzeko, etxean marraztutako marrazkiari argazkia atera behar zaio (mugikorrarekin atera daiteke) eta honako helbidera bidali: marraztuetxean@gmail.com. Argazkiarekin batera, adierazi behar dira haurraren izen-abizenak, adina eta harremanetarako telefono zenbakia.
6 sari
Parte-hartzaile guztien artean 6 sari zozketatuko dituzte: 50 euroko balioa duten txartelak, herriko saltokietan erabiltzeko. Astelehenean jakinaraziko dituzte zeintzuk diren saridunak. Halaber, astelehenetik, lehiaketara aurkeztutako marrazki guztiak Plaentxia.eus atarian ikusi ahal izango dira.