Azken orduotan, kezka eragin du Mesedeetako egoitzan egoiliar batek Covid-19aren proban positibo eman duela jakiteak, nahiz eta asintomatikoa izan. Atzo gaueko emaitzek, baina, lasaitasunerako mezua ekarri dute. Izan ere, haien arabera, egoiliar horrek infekzioa pasatuta eta gaindituta dauka. Bestela esanda, dagoeneko pertsona horrek ez du ez bere buruarekiko arriskurik, ez eta inguruko egoiliarrekiko eta langileekiko arriskurik ere.
Adinduak eta gazteak
Osterantzean, herriari dagokionez, azken datuek diote 11 soraluzetar daudela Covid-19 gaitzaz kutsatuta. Horietatik bi asintomatikoak dira, beste bi ospitaleratuta daude, eta, beraz, 9 lagun etxean daude berrogeialdia egiten. Gaitza hartuta duten soraluzetarren artean denetik dago, adinduak bai, baina baita gazteak ere.
Proba gehiago
Euskal Autonomia Erkidegoko azken datuen arabera, behera egin du kutsatu kopuruak. Ikusten denez, berriz, ez da horrela izaten ari Soraluzen. Horren arrazoiarengatik galdetuta, Lourdes Letona medikuak esplikatu du orain proba gehiago egiten ari direla, eta horrez aparte, bere ustez martxoan herritar ugarik pasatu dute koronabirusa jakin barik, edo katarro sinple bat bailitzan.