Legeak dioen moduan, bi hilabetez lehortzen egon ondoren, zapatutik salgai izango dira Egotzako ahuntz-esnearekin egindako aurtengo gazta berriak.
Merkatu-plazan ipiniko dute saltokia, eta bertan izango da erosteko aukera. Gainera, ilaran itxaroten ahalik eta denbora gutxien egon nahi izanez gero, aldez aurretik egin daiteke eskaera telefonoz; hartara, bezeroak zapaturako gertu izango du erosketa, joan eta hartu besterik ez du izango.
Enkarguak
Horrez aparte, kalera jaitsi ezinean dauden herritarrei gazta etxera eramateko zerbitzua eskainiko diete Egotzakoek. Enkarguak egiteko, telefonoz deitu edo whatsappa bidal daiteke, honako telefono zenbakietako batera: 615 76 30 62 / 659 55 41 39.
Inguruko herrietan
Bestalde, Egotzako gaztak bertako eta inguruko beste hainbat saltokitan ere eskura daitezke: Soraluzen, Kooperatiban, Etxabe harategian eta Criado fruta-dendan; Eibarren Mujika eta Artamendi harategietan eta Itxesi belar-denda; Elgoibarren Patxiren harategian eta Arrasaten eta Bergaran Ereindajan kooperatiban.
Nagore Martinek bizpahiru egunetik behin egiten du gazta, urrira arte. Kontatu duenez, lan eta lan dihardute Egotzan, baina azokak-eta kendu egin dizkiete, eta hori hilabete barru igarriko dutela uste du.