Covid-19 gaitzaren hedapen-datuek beherantz segitzen duten arren, Soraluzen bosgarren kasu positiboa atzeman berri da. Osasun arloko langilea da bera, gizarte-langilea zehazki, inguruko egoitza batean lanean diharduena (Soraluzekoan ez). Atzo egin zioten proba eta gaur ailegatu da haren emaitza: positibo.
Lankideei probarik ez
Hori bai, positibo eman arren, oraingoz, gaixoa etxean dago; hau da, ez du ospitaleratu beharrik izan, beraz, dituen sintomak arinak dira.
Bestalde, azken egunotan, eskualdeko beste hainbat osasun langilek ere, hainbat medikuk kasu honetan, positibo eman dute Covid-19aren proban. Haien lankideei dagokienez, berriz, ez diete probarik egin.
Osterantzean, albiste hobeak dituzte Soraluzeko zein Elgoibarko egoitzetan, izan ere, bi egoitzetan segitzen dute koronabirusaz garbi.