Martxoaren 14an dekretatu zuen Espainiako Gobernuak alarma egoera lehen aldiz. Harrezkero, beste bi luzapen ezarri ditu, herritarren konfinamendua oinarri izanda. Bada, alarma egoeraren laugarren astea dugun honetan, oraindik orain, Soraluzen ez dago maskararik.
Atzo, astelehena, Ibañez Antolin farmazian bakarrik lauzpabost jaso zituen: “Saltzekorik ez daukat, bakarrik lauzpabost ailegatu dira, eta maskarak erosi nahi dutenen itxaron zerrenda luzea dago”, esplikatu du Blanca Ibañez farmazialariak. Ibañez farmazialariak berak teladun maskara batekin dihardu lanean.
Kalebarrengo Oruesagasti farmaziara, berriz, ez da iritsi maskara bat bera ere. Ana Oruesagasti farmazialariak espero du datozen egunotan iritsiko direla, baina han ere itxaron zerrenda luzea dute.
Bestalde, ez farmazia batean, eta ezta bestean ere, ez dute eskularrurik.