Apirilaren 12an Aberri Eguna izango da, eta beste hainbat ekitaldiri bezala, konfinamenduak egun horri ere eragingo dio. Hori dela eta, Euskal Herriko 27 pertsona ezagunek, tartean Cristina Jacas Mateu soraluzetarrak (suhiltzaile gisa), Euskal Herria Batera izenpean, dei egin diete herritarrei Aberri Eguna balkoietan ospa dezaten, ikurrinak eta Nafarroako banderak eskegita. Ondoren, elkarrekin abesti bat kantatzea ere proposatu dute.
12:30ean balkoira
12:30 izango da balkoietara ateratzeko unea: lehenik, ordu horretan minutu batek isilunea gordeko da hildakoen omenez, eta gero Txoriak txori kantatuko dute, gaixotasunaren aurkako auzolanean harrotasuna eta aurrera egiteko indarra azaltzeko. Irratietan kanta hori jartzeko eskatuko dute.
Argazkiak bidaltzeko eskatu dute
Gainera, Aberrieguna2020.eus webgunea prest da jada norbanakoen argazki eta mezuak jasotzeko (kartelak eta irudiak deskarga litezke). Argazki horiek guztiak batu eta datorren igandean sare sozialetan zabalduko den mosaiko erraldoi bat osatuko dute. Era berean, hala nahi duen eragile guztiei ere deialdiareki bat egiteko aukera eman diete. Horrez gain, iragarri dute norbanakoen atxikimenduak jasotzeko adierazpen bat lantzen ere ari direla.