Behar gehien dituzten eskualdeko eta inguruko osasun zerbitzuak indartzeko helburuarekin, Soraluzeko anbulatorioko medikuak birkokatu egingo dituzte datozen orduotan.
Anbulatorioa zabalik
Horrek aldaketak ekarriko ditu, besteak beste, Soraluzeko anbulatorioan. Baina zentroak zabalik segituko du.
Orain arte helarazitako informazioaren arabera, anbulatorioan Alazne Mujika erizaina geratuko da, Sintroma eta kurak behar dituztenei arreta emateko, etxez etxe.
Harekin batera izango da, baita ere, Yolanda García informazioa emateko.
Telefono zenbaki berriak
Bestalde, Covid-19 koronabirusaren sintomak -kalentura, eztula, arnasa hartzeko zailtasunak...- izanez gero, anbulatoriora bertara deitu beharra dago lehenengo: 943 75 23 00. Haren ondoren, berriz, larrialdietako telefonora: 943 46 11 11.
Anbulatorioko telefonotik deia desbideratu egingo dute gauerdira arte arreta emango duen call-center batera. Medikuak izango dira bertan arreta ematen, besteak beste.
"Telefono bidezko arreta ematen segituko dugu, baita etxeetara joaten ere. Elgoibartik abiatuko gara zerbitzuak ematera, baina oraindik ez dakigu zein arduratuko den zeregin bakoitzaz", esplikatu du Lourdes Letona medikuak.
Asteburuan, Elgoibarrera
Bien bitartean, asteburua izanik, soraluzetarrendako erreferentziazko zentroa Elgoibarko PACa da. Gaur eta bihar, 08:00etatik 20:00etara emango dute telefono bidezko arreta: 943 03 26 10.