Goizean goiz, jende nahikotxo ibili da erosketak egiten. Baina asko ohitutak aldatuta aritu dira. “Orain arte, batzuk egunean hainbat bider irteten ziren kalera erosketak egitera; orain, berriz, batzuk erosketa zerrendarekin etorri dira, erosi beharreko guztiak erosi eta etxera joateko”, kontatu du Itziar Agirrek, Iratxo saltokiko ugazabak.
Arratsaldez itxita
Eguerdian, igarri da jarrera aldaketa hori. Ez zegoen ia batere ilararik. Hala, Mendizabal eta Bolintxo okindegiek erabaki dute arratsaldeetan ez dutela zabalduko, eta bestelako saltoki batzuek ez dute baztertzen gauza bera egitea.
“Guk ere pentsatu dugu”, dio Agirrek, “oraingoz, baina, zabalik segituko dugu. Guraso asko umeen eskolako lanak hemen ari dira inprimatzen, eta gaur arratsaldean halako asko etorriko dira”, gaineratu du.
Zabalik
Kooperatibak ere zabalik segituko du arratsaldeetan, nahiz eta bertako langileek aitortu lan eta lan ari direla, “ordu mordoa” lanean. “Lantegiek zabalik segitzen duten bitartean, hemen egongo gara, Lanean dabiltzan langile askok arratsaldean erosi besterik ez dute”, esplikatu dute.