Espainiako Gobernuak berriki sortu duen Animalien Eskubideen Zuzendaritzak maskoten zaintzarekin lotutako jarraibideak eta gomendioak helarazi berri dizkie tokian tokiko erakundeei; Soraluzeko Udalari ere bai.
Lehenik eta behin, azpimarratu dute ez dagoela ebidentzia zientifikorik etxeko animaliak Covid-19az kutsatzen edo transmititzen direla esaten duenik.
Gomendioak
Ohiko gomendio orokorrez gain (esku-garbiketa, distantzia...), etxeko animalien zaintzari dagozkion gomendio sorta zabaldu dute:
- Animalia ukitu ondoren, eskuak garbitu eta ez ukitu norbere ahoa, sudurra edo begiak.
- Kaletik etxeratzean, txakurren buztanak eta hankazpiak gel desinfektatzailearekin garbitu behar dira.
- Covid-19an positibo eman duten pertsonen kasuan, haien maskotak, ahal dela, beste norbaitek zaindu beharko lituzke.
- Hori ezin bada egin, ahal dela, garbitasun neurriak zorroztu egin behar dira; animaliaren aurrean maskarilla erabili behar da eta animalia ahalik eta gutxien ukitu.
Zer egin behar den, eta nola:
- Animaliak denbora mugatuan atera behar dira kalera, haien beharrak egiteko denbora beste.
- Kalean ahalik eta jende gutxien dagoenean atera behar dira.
- Saihestu egin behar da bestelako animaliekin zein pertsonekin kontaktua izatea.
- Txizak garbitzeko, detergentearekin nahastutako ur-botila eramatea.
- Txakur kakak batzea.
- Segurtasun indarrei eskatu diete arretaz zaintzea “txakurren alokairua” eskaintzen dituzten web orriak.
- Katu-koloniak elikatzeko orduan, ahalik eta jende gutxien dagoenean joan, eta ahalegindu denboran luzatzen jate-emate horiek.
Era berean, gogorarazi dute allbaitaritza klinikak zabalik daudela, baina aldez aurretik txanda eskatu behar dela, itxaron geletan jende-pilaketa saihestu ahal izateko.