Herri txikietan galtzen dabiltzan zerbitzuen adibide garbia da BBVArena. Gutxienez, 1960ko hamarkadatik eskaini du zerbitzua Soraluzen. Baina, zerbitzuak herri-hiri handietara eramateko eta Internetez eskaintzeko joerarekin bat eginez, BBVAk itxi egin zuen Soraluzeko bulegoa orain dela 6-7 bat urte.
Oraingoz, hutsik segituko du
‘Patria’ telesailaren grabaketetan erabili zen hura azkeneko aldiz, iaz, langileendako zerbitzuak bertan jarri zituzten-eta aldi baterako. Gero, berriz itxi zituen ateak, eta atzo, eguena, guztiz hustu zituzten banketxearen bulegoak zirenak. Diru-makina eraman egin zuten, eta baita BBVA zioten letreroak ere.
Orain, bada, orain arte baino hutsago gelditu da banketxearen antzinako lokala, eta itxura du epe ertain-luzean segituko duela horrela. Izan ere, lokala salgai zein alokatzeko, bietara egon da aukeran, baina oraingoz, ez du ez eroslerik eta ezta maizterrik aurkitu ere.