- Zela bukatu duzu hemen, horren urrutikoa izanda?
- Curriculuma bota nuen Eibarren, eta hemendik deitu zidaten, lan-poltsa bateratua dago-eta.
- Berez, Eibarren lan egin nahi zenuen?
- Ez, bertan atera zen eskaintza, eta horregatik bota nuen hara curriculuma, beste udaletxe askotara moduan. Eta begira, hemendik deitu didate.
- Eta zer moduz?
- Momentuz, ondo. Dena berria da niretzat. Lehen aldia da polizia modura ere.
- Orain arte gidari izandakoa zara, ezta?
- Tranbiako makinista nintzen, Gasteizen. Euskotrenen sartu nintzen, eta lehenengo hemen ibili nintzen, Lurraldebuseko autobusak gidatzen, eta gero joan nintzen Gasteizera tranbia gidatzera.
- Hortaz, ederra aldaketa!
- Bai, niretzat bai; urte asko daramatzat honen bila. Nire bokazioa da polizia izatea. Urte asko dela hasi nintzen honetarako prestatzen, 2014tik, beraz, pozik nator.
- Noiz arte etorri zara?
- Espero dut luzerako izatea. Nestorren (Iñurrieta) lekua betetzera etorri naiz. Eta ea nola doan. Nik plaza finkoa atera nahiko nuke.
- Lurraldebusen gidari izanda, ezagutzen zenuen Soraluze?
- Kanpotik. Errepideak, eta Olako zubia. Soraluze-Ondarroa autobusa gidatzen nuen, eta han nuen geralekua.
- Zein da zure lehen inpresioa?
- Kidearekin (Josu) oso ondo nabil, ikasten nabil, eta eroso sentitzen naiz.
- Ez zaizu urruti geratzen jaioterritik?
- Bueno, Gasteiz urrutirago dago. 50 kilometro kendu ditut egunero.