Ezusteko ederra hartu du Gabolats kaleko bikote batek, goizean jaiki, eta lapurretan egin dietela jabetu denean. Ezusteko ederra, ezen, gauez sartu zaizkie lapurrak etxe barrura, eta bikoteak ez du ez ezer entzun, eta ezta ezer sumatu ere, nahiz eta gizona gauez esnatu egin den.
Atzetik sartu
Poliziak emandako informazioaren arabera, bigarren solairuko etxebizitza batera sartu dira oraingoan, leiho batetik sartu ere, nahiz eta hura itxita izan, eta pertsiana erdi jaitsita. Hori bai, etxearen atzeko aldean dagoen leihoetako bat erabili dute sartzeko, bigarren solairua izan arren, etxe horretako atzeko parteko leihoak baxuago baitaude.
Besteak beste, horregatik uste du Ertzaintzak lapurrek lekua aldez aurretik ezagutu egin behar dutela, bestela zaila da-eta halako xehetasunen berri izatea.
Hirugarren kasua
Urte hasieratik hona, dagoeneko udalerriko hiru etxebizitzatan sartu dira lapurrak, modu bera erabilita. Gaiarekiko geroago eta ardura handiagoa dago herrian, batik bat, solairu baxuetan bizi diren bizilagunenak, ikusi baita leihoak ixtea, eta bizilagunak etxean bertan egotea ez dela eragozpen nahikoa lapurrak sartzeko. Gainera, udalerrian etxebizitza asko daude solairu baxuetan.