Gipuzkoako landa garapeneko proiektuei errekonozimendua eskaintzea dute helburu Landaola Sariek. Gaur da haiek banatzeko ekitaldia, eta lau sari emango dituzte: erakunde pribatuen arloko ekimena; erakunde publikoaren arloko ekimena; urteetako ibilbideari saria eta emakumeak landa eremuan saria. Aurtengo edizioan, Soraluzeko hautagaitza ere izango da: Txurruka jatetxea.
14 laguni lana eman
Debemenek, Debabarreneko landa garapen elkarteak aurkeztu du Txurruka jatetxea, “aktibitate ekonomiko berria eta lanpostuak sortzeagatik”. Xehetasunak galdetuta, Ikerne Laskurainek esplikatu du hamar soraluzetarrek egiten dutela gaur egun lan Txurrukan, etxekoak diren lau langileez aparte. Beraz, 14 laguni ematen diote lana bertan.
Hark gaineratu duenez, pozik daude hautagai modura aurkeztu izanagatik: “Jende askok zoriondu gaitu, jendearengana ailegatu da Txurruka, eta gure proiektuaren berri zabaldu da. Azkenean landa eremuan gaudenondako zailagoa da jendearengana ailegatzea, eta oso ondo iruditzen zaigu halako ekimen bat egotea”.