Joan den urtarrilaren 10ean batzarra egin zuten nagusien egoitzetako gatazkan inplikatuta dauden alde guztien ordezkariek. Haren ondoren, ELA sindikatuak jakinarazi zuen luzatu egin behar zutela langileen greba otsailaren 7ra arte, sindikatutik egindako eskakizunak ez baitzituzten bete “sektoreko patronalek”.
Barikuan, Donostiara
Halaber, sindikatuak jakinarazi zuen patronalek urtarrilaren 17rako “konpromisoa” hartu zutela eskakizun horien gaineko proposamen bat aurkezteko, eta horrexegatik justu, elkarretaratzea egingo dute barikuan Donostian, Lan Harremanen Kontseiluaren kanpoko aldean. Izan ere, hantxe egingo dute urtarrileko bigarren batzarra gatazkan inplikatuta dauden alde guztiek.
Barikuan, Soraluzeko Mesedeetako egoitzako langileen ordezkaritza bat ere bertaratuko da Donostiara; eta horren aurretik beste elkarretaratze bat egingo dute: bihar, 19:00etan, Plaza Berrian. Bi protesta ekimenez gainera, urtarril osorako egutegia ere antolatuta dute.