Udaltzaingoak emandako informazioaren arabera, auto bati pasoa laga nahian zebilen kamioi bat larregi gerturatu da Santa Ana kaleko 23. atariko etxera, harik eta paretan dagoen argindarraren kutxatila kolpatu duen arte. Kolpearen ondorioz, Iberdrolaren kutxatilak ondoan dagoen gas kutxatila kolpatu du, eta kutxatilaren barruko gas-harguneak oker laga ditu. Hortik hasi da, hain justu, gasa irteten; eta egoera ikustean, kamioi gidariak abisua eman du.
Igogailu eta gas barik
Udaltzainak berehala bertaratu dira, eta bizkor ibili dira Eibarko suhiltzaileak ere. 09:10erako bertan zeuden. Gas jarioa eten egin dute, eta bide batez, Santa Ana kaleko 26. atariko gas kutxatilaren atea bere lekuan ipini dute, bart gaueko haizeteak hura bota egin baitu.
Une honetan, bada, Santa Ana kaleko 23. atarian ez dute gasik, igogailua ere ez dabil, eta hainbat solairutan ez dago argindarrik. Edozein modutan, iristear dira gas enpresako adituak, egoeraren jakinaren gainean daude-eta.