Kasu errealak oinarri izanda, bihar, eguena, Interneteko arriskuez ohartaraziko die David Mekolalde ertzainak Soraluzeko Institutuko lehen mailako ikasleei. 50 bat entzule izango ditu Deba-Urola komisariako poliziak. Bestelako arriskuen artean, ziberjazarpena izango dute aztergai.
Edurne Burgoak, BHI Institutuko zuzendariak jakinarazitakoaren arabera, urteak daramatzate gazteekin gaia lantzen ikastetxean: “Lehen, 4. mailako ikasleei zuzenduta egiten genuen, baina ikusi genuen beranduegi zela, eta orain 1. mailako ikasleekin egiten dugu. Eraginkorra da hitzaldia. Askotan, hari esker gazteek ikusten dute eurendako normala dena ezin dutela egin”.