Bizikale Merkatari Elkarteko ordezkariak bertan zirela, ume baten esku garbiak atera du zakutik otarraren zenbaki irabazlea: 3.350; zozketa bera kamera aurrean grabatu dute, prozesuaren gardentasunarekiko zalantzarik izan ez dadin.
Kontuak kontu, oraingoz ez da azaldu zenbaki irabazlearen jabea; eta datozen 15 egunotan azaltzen ez bada, beste zenbaki bat atera eta ordezko horri emango diote otarra. Ez da, gainera, nolanahiko saria. Zubian, Belarrak dendaren lehenagoko erakusleihoan ikusgai dago, eta denetik dauka: jakiak, jantziak, osagarriak, kapritxoak… hain justu, Bizikaleko bazkide guztien artean osatutako otar ikusgarria.
Gazte-helduak pistara
Bestalde, Bizikaletik iragarri dute gaur, Gabon Zahar egunean arratsaldez ere zabalduko dutela izotz-pista: 17:00etatik 19:30era, eta bertaratzeko gonbita egin dute, batez ere, gazte-helduei, orain arte halako asko ez da-eta pistan ibili.