Urteko azken ospakizuna egingo dute Itxaropena elkartean barikuan. 17:00etan hasita, lehenengo sariak banatuko dizkiete, musean, briskan eta tutean jokatzen ibili diren bazkideei, karta-joko mota bakoitzeko hiru sari.
Txistor pintxoak, guztiendako
Horren ondoren, txistor pintxoak banatuko dituzte bertaratzen direnen artean. 20 kilo txistor erosiko dituzte herrian pintxotarako. Eta txistorrari laguntzeko edaria ere emango dute, dena doan.
Eta arratsaldea borobiltzeko, 30 otar zozkatuko dituzte Itxaropenako bazkideen eta babesleen artean. 600 bazkide inguru dira, eta 25 babesle.
Bestalde ohartarazi dute aste honetako egueneko bingo saioa izango dela azkena; gero, urtarrilaren 16an hasiko da bingoa berriro ere.