Atzo, milaka lagunek manifestazioa egin zuten pentsio publiko duinen defentsan, Gasteizen. Hainbat komunikabideren arabera, 5.000 pertsona inguru elkartu ziren legebiltzarraren aurrean, eta manifestazioaren amaieran, pertsona nagusiekin lan egiten duten eta pentsioak defendatzen dituzten 22 elkartek babestutako komunikatua irakurri zuten.
Haren bitartez, aldarrikatu zuten azken ia bi urteetan kalean defendatzen ibili diren eskaerak legebiltzarrak legez babes ditzala, haiek Espainiako Kongresuan aurkezteko: “Estatuko Aurrekontuekin finantzatuko den Pentsioen Sistema Publikoa; pentsioak urteko KPIaren arabera igo daitezela; gutxieneko pentsioa 1.080 euro baino txikiagoa izan ez dadila; 2011 eta 2013ko lege erreformak indargabetu ditzatela eta jasangarritasunaren faktorearen baitan dagoen generoarekin lotutako aldea ken dezatela”.
“Gobernuan dagoena dagoela, pentsio publikoak babestu behar dira beti!”, bukatu zuten protesta ekimena.
Argazkiak: Txaro Lete Lakuesta