Aste honetan bestelako itxura hasi da erakusten kiroldegiko solairu berria. Izan ere, Baltegietara begira dagoen egitura metalikoari ipini diote pareteko estalkia.
Ikusgai dira, baita ere, izango dituen sei leiho berriak: bata spinning gela berriarendako eta beste bostak erabilera anitzeko aretoarendako.
Baltegieta kalera begira dagoen egitura tapatu ondoren, datozen egunotan hasiko dira tapatzen ibai aldera eta Gaztelupe aldera dagoen egitura. Eta horra begira sortuko duten gelan egokituko dute gimnasio berria, hori ere leihoz inguratuta.
Gimnasiorako makina berriak
Irailaren amaiera aldera hasi zituzten kiroldegiari solairu berria gehitzeko obrak. Construcciones Artzamendi enpresa dabil lanok egiten, 568.000 euroko aurrekontuarekin. Iker Aldazabal alkateak azpimarratu du aurreikusitako epeak betetzen dabiltzala, beraz, "ea bada, apirilerako bukatzen dituzten lanak", dio.
Dena delakoa ere, dagoeneko aurreikusi dute partida bat 2020ko aurrekontuan gimnasio berrirako makinak erosteko: 27.000 euro. Hori bai, oraindik aurrekontua onartu barik dago, beraz, oraingoz hori proposamena da.