Gogoratzen/Recuerdas? izenburuarekin, 80ko hamarkadaren amaierako eta 2000ko hasierako 30 argazkirekin erakusketa ipiniko du Kontrargi Argazkilari Kolektiboak urtea amaitzeko, erakusketa gelan.
Abenduaren 8an inauguratu, eta abenduaren 30era arte izango dira ikusgai. Kontrargitik helarazitako xehetasunen arabera, argazkiotan azaltzen dira pertsonak zein lekuak, guztiak ere udalerrikoak.
Sari nagusia Bergarara
Bestalde, joan den azaroaren 17an jokatutako XXXI. Kontrargi Argazki Rallyaren emaitza jakinarazi dute: sari nagusia Bergarara joan da, Jose Luis Feo argazkilariaren eskuetara; bigarren izan da, berriz, Beasaingo Javier Quirós eta hirugarren, Donostiako Jose Angel Amutxastegi. Horiez aparte, garaikurra eskuratu du, baita ere, Carlos de Cos soraluzetarrak, udalerriko sariduna bera izan da-eta.
Epaimahaiak azaroaren 29an jakinarazi zuen emaitza. Honako kideek osatu zuten berau: Azkoitiko Mikel Zengotita, Zaldibarko Roberto Madariaga eta Bergarako Agustin Gurrutxaga.
Guztira, 31 parte-hartzaile izan zituen Kontrargiren aurtengo rallyak; horietatik lau argazkilari herrikoak izan ziren, 22 Gipuzkoakoak eta gainerako bostak Bizkaikoak. Eta horien guztien artetik, bakarra izan zen emakumezkoa, beste guztiak gizonezkoak izan ziren. 14 urtetik beherako partaiderik, berriz, ez zen izan.