Azaroan euria egiten hasi zenetik, 20 egunean atertu ere ez du egin, aste honetako martitzenera arte. Euriteen ondorioz, ufala izan da hainbat egunetan, eta halakoetan sarri geratzen den moduan, enborrak eta bestelakoak ekarri ditu ibaiak.
Presa efektua
Bada, enbor handi horietako bat Atxuriko zubiaren zutoinean trabatuta dago martitzenaz geroztik. Eta gaur etorriko dira berau erretiratzera URA agentziakoak, Soraluzeko Udalak horrela eskatuta.
Hain justu, halako gertakariengatik eraiki nahi du Udalak oinezkoendako zubi berria Atxuri inguruan, eta zaharra bota. Azken horrek hainbat eustorma ditu, eta zutoinetako bat ibai erdian dago. Horrek eragotzi egiten dio ibaiari libre pasatzea, presa efektua egiten du, eta ura pilatzea arriskutsua da.