Astelehenero moduan elkartu dira gaur Plaza Berrian “pentsio publiko duinak” aldarrikatzeko. 80 bat herritarrek babestu dute gaurko deia eta tartean jakinarazi dute bi soraluzetar abiatuko direla Madrilera, eguaztenean bertan egingo duten manifestazioan parte hartzera.
60.000 baino gehiago
Horrez aparte, gogora ekarri dute, besteak beste, eguenean dela Pobrezia Ezabatzeko Nazioarteko Eguna, eta zentzu horretan jakinarazi dute “Euskadin pobrezia egoeran 60.000 pertsona baino gehiago” daudela “inongo babes sozial sistemaren babesean ez daudenak”.
“Emakume pentsionista izateak edota pentsiorik gabekoa izateak, edota alarguntza pentsioduna izatea berak pobreziaren atarian kokatzen gaitu zuzenean, eta batzuetan, atari horren azpitik. Larritasun sozial baten aurrean gaude. Ezinbestekoa da emakumeak kalera ateratzea, bakarrik gu entzun eta ikusten gaituztenekin hitz egiten dutelako gutaz, eta hau edonon geratzen da”, salatu dute.