Datorren astean hasiko dira sormen tailerrak

Umeak robotikan, udako ikastaroetan.

Robotika eta xakea sormen tailerretarako taldeak sortu dira. Beraz, urritik maiatzera esparru horietan trebatzeko aukera izango dute 20 ume baino gehiagok, datorren astean hasita. Bertsolaritzan izena emateko aukera luzatu egin dute, zirko tailerrari dagokionez, berriz, probaldia zabalduko dute eta psikomotrizitatea lantzeko ez da talderik eratu. 

Bost sormen tailer eskaini ditu aurtengo ikasturterako Soraluzeko Udalak, Herrixak Hezi programaren baitan. Eta horietatik hiru arlotarako izen-ematea itxi dute eta datorren astean hasiko dira haiek lantzen: robotika (urriaren 2an), xakea (urriaren 7an) eta zirkua (urriaren 1ean). 

Robotika tailerrak erakarri ditu ume-gazte gehien: bederatzi. Xakean jarduteko, berriz, izena eman dute zazpi neska-mutikok eta zirkurako bostek. Hori horrela, zirkuan abendura arteko proba egingo dute, tartean ate irekien saioa ere eginez, jende gehiago erakarri nahian.

Bestalde, bertsolaritzarako izen-ematea luzatu egin dute, beraz, datozen egunotan ere egin daiteke hori udaletxeko harrera bulegoan.