Jende ugari ibili da asteburuan Txurrukeneko jaietan. Auzotar eta herritar asko erakartzen dituzten jaiak izanda, aurten benetan jendetsu joan dira jaietako hiru egunak, eguraldia lagun izan dute-eta.
Horren adierazle, adibidez, atzo domeka batek baino gehiagok ez zuen astirik izan otarrainxkak dastatzeko, berehala agortu ziren-eta. Barikuan, berriz, ogi barik geratu ziren txosnan, jendeak bertan afaldu nahi izan zuen-eta: “Bederatzi barra gehiago igo genituen eta horrela konpondu ginen”, esplikatu dute. Eta zapatua ere bide beretik joan zen, bazkariak, jolasek, umeendako animaliek eta zela ez, su artifizialek lagunduta.
Zozketako irabazleak
Ostera, eta aipagarrien artean, Mesedeetako jaietan estreinatu dira Soraluzeko Udalak eskuratu dituen buruhandi berriak. Bestalde, jaiak antolatu ahal izateko saldutako txartelen irabazleen bila dabiltza oraindik. Zenbakiak, honakoak:
- 847 (ordezkoa, 772)
- 1.367 (ordezkoa, 903)
Irabazleek irailaren 30era arteko epea izango dute saria eskuratzeko. Agertu ezean, urriaren 1etik 15era bitartean zenbaki ordezkoen jabeendako izango dira sariak. Eta haiek ere ez badira agertzen, sariak emateke lagako dituztela ohartarazi dute.