Bakoitzak bere ukitu berezia emanez, goxo-goxo prestatu zituzten tortillak Andramarietako lehiaketan parte hartu zuten 12 bikoteek. Patata tortillak egin zituzten aurrena, eta tortilla bereziak ondoren. 13:00ak ingururako guztiak gertu egon behar zuten, orduantxe egin zuten-eta sari banaketa.
Epaimahaia osatu zuten Jose Ramon Zabalak, Leire Elizburuk eta Iñaki Iñarrak; eta zaporea, testura eta aurkezpena kontuan hartuta emandako puntuen arabera, hiruek aukeratu zituzten aurtengo tortillarik onenak.
Hurrenez hurren, honakoek eskuratu zituzten sariak, patata tortilletan:
Domentx Uzinek eta Marta Jofrak (Vilanova y la Gertru)
Lierni Elizburuk eta Ines Laskurainek
Piedad Gallastegik eta Santiago Gonzalezek
Eta tortilla bereziaren saria, berriz, Roberto eta Maria de la Rosa aita-alabendako izan zen, bakailaoaz eta piperrez egindako tortilla eginda. Hain justu, iaz bi tortilla motatan irabazle izan ziren De la Rosa aita-alabak, beraz, ederki defendatu dute iaz eskuratutako txapela.
Oro har, honako bikoteek parte hartu zuten atzoko lehiaketan:
- Ane Orbea eta Elene Etxaniz ama-alabek lehen aldiz: “Aspalditik genbiltzan “pikatuta”, eta aurten hemen geunden eta animatu egin gara”, esplikatu zuen Orbeak.
- Miren Gallastegik eta Oihane Lasak bigarren aldiz: “Iaz ederki pasa genuen eta aurten berriro egitea pentsatu dugu”, esan zuten.
- Iraultza Diez eta Enaitz Diaz aita-alabek lehen aldiz: “Abuztuaren 14an komentatu genuen akaso apuntatuko ginela eta horrelaxe animatu gara”, esan zuten.
- Piedad Gallastegik eta Santiago Gonzalezek azken urteotan parte hartu dute: “Ander Epelderekin 3 bat urte egin nituen eta haren ondoren Santirekin hasi nintzen. 18 bat urte daramatzat parte hartzen”, kontatu zuen Piedad Gallastegik.
- Ander Epeldek eta Javier Zazok, azken horrek lehen aldiz: “Ikasten ere bagabiltza, ez da bakarrik etorri eta jan”, esan zuen Zazok.
- Pura Corcherok eta Juanita Soraluzek: “Hiru urtean irabazi dugu; animatuta gaude”, esplikatu zuen bikoteak.
- Roberto eta Maria de la Rosa aita-alabak partaide finak dira: “Iaz irabazitakoa defendatzera gatoz, baina batez ere goiza primeran pasatzera”, esplikatu zuen Roberto de la Rosak.
- Lierni Elizburuk eta Ines Laskurainek iaz izan zuten estreinaldia: “Ondo pastu genuen iaz eta aurten berriro aurkeztu gara”, esan zuten.
- Mesedeetako egoitzakoek, berriz, aurten bi bikoterekin parte hartu dute: Mari Corbachok eta Filomena Reguilonek eta Fidel Gonzalok eta Jesus Reyesek. “Uztailean, bakailao lehiaketan hirugarren saria eskuratu zuten”, gogora ekarri zuten.
- Marta Jofrak eta Domentx Uzinek lehen aldiz parte hartu dute: “Errua Domentxena da, esan zigun jaietan geratu nahi bagenu, lehiaketan parte hartu behar genuela”, esplikatu zuen Jofra kataluniarrak.
- Aitor Gilek eta Rafa Ariznabarretak aspaldiko partez parte hartu zuten: “Aspaldi egoteke geunden eta aurten animatu egin gara”, esan zuten.
Lehiaketaren ondoren, ohi denez, txartelak banatu zituzten tortilla pintxoak eskuratzeko. Eta gustura asko jan zituzten Plaza Zaharrera bertaratu zirenek.