Danbateko galantarekin hasi dira jaiak

Iazko kanoikada “xuabeegi” joan zelakoan, aurten kanoia bolboraz gehiago kargatu eta danbateko galanta jaurti zuten Zabala anaiek jaiak hasi direla iragartzeko. Horren aurretik esan zuten pregoia Korner Morea Elkarte Transfeministako kideek eta segidan lehertu zen festa zubian.

Azken urteotako ohiturari segika, gaseosa botilak eskuetan, haiek gogotik astindu eta ingurukoak zipriztinduz estreinatu zituzten jaiak Zubi Nagusia bete zuten herritarrek, umeak eta gazteak gehienak. Galtzagorrien txarangaren gidaritzapean segitu zuen ondoren festak kalean, Frantziska Iraolagoitiaren bideoak erakusten duen moduan.